தென்னிந்தியாவின் மிகவும் செல்வாக்கு மிக்க தொழில் குடும்பங்களில் ஒன்றில் பிறந்தவர் காவ்யா மாறன். பொதுவெளியில் அதிக கவனத்தை ஈர்க்காமல் தனது பாதையை அமைத்துக் கொண்டாலும் தொழில் மற்றும் வணிக வட்டாரங்களில் நன்கு அறியப்பட்டவர்.

இசையமைப்பாளர் அனிருத் ரவிச்சந்தர் உடனான அவரது திருமணம் பொதுமக்களின் கவனத்தை அவரது பக்கம் திருப்பியுள்ளது. பல மாதங்களாக வதந்திகளும் ஊகங்களும் பரவியிருந்தபோதிலும், காவ்யா அல்லது அனிருத் இருவரும் தங்களது உறவைப் பற்றி பொதுவெளியில் பேசவில்லை. ஒருகட்டத்தில் திருமண வதந்திகளை அனிருத் மறுத்தும் இருந்தார். எனினும், தற்போது இருவருக்கும் இடையில் திருமணம் நவம்பர் 11ஆம் தேதி நடைபெற்றது.

1991ஆம் ஆண்டு சென்னை நகரில் பிறந்த காவ்யா, கலாநிதி மாறன் மற்றும் காவேரி கலாநிதி மாறன் தம்பதியரின் மகள். இந்தியாவின் முன்னணி ஊடகக் குழுமங்களில் ஒன்றான சன் குழுமத்தின் வாரிசாக அறியப்படும் அவர், வணிகம், அரசியல், விளையாட்டு, பொழுதுபோக்கு என பல்வேறு செல்வாக்கு மிக்க துறைகளின் சந்திப்புப் புள்ளியில் நிற்கிறார்.

சென்னையில் வணிகவியல் படிப்பில் இளங்கலை முடித்த காவ்யா, பின்னர் எம்பிஏ பயின்றார். கல்வியை முடித்த பின் குடும்ப வணிகத்தில் இணைந்த அவர், சன் குழுமத்தின் பல்வேறு செயல்பாடுகளில் ஈடுபட்டு அனுபவம் பெற்றுள்ளார்.

கடந்த சில ஆண்டுகளுக்கு முன் சன் டிவி நெட்வர்க்கின் செயல் இயக்குநராக பொறுப்பேற்றது அவரது தொழில் வாழ்க்கையின் முக்கிய கட்டமாக அமைந்தது. ஊடக நிறுவனத்தின் செயல்பாடுகள், வளர்ச்சி திட்டங்கள், டிஜிட்டல் தளங்கள் உள்ளிட்ட துறைகளில் அவர் பங்காற்றி வருவதாக நிறுவன வட்டாரங்களில் கூறப்படுகிறது. குறிப்பாக, சன் குழுமத்தின் ஒடிடி தளமான சன் நெக்ஸ்ட்டில் (Sun NXT) அவரது பங்கு முக்கியமாக இருந்ததாக கூறப்படுகிறது. இருப்பினும், தனது பணியைப் பற்றி அவர் பொதுவெளியில் அதிகம் பேசியதில்லை.

ஆனால், இந்தியா முழுவதும் காவ்யா மாறனை அறிமுகப்படுத்தியது தொலைக்காட்சி உலகல்ல, கிரிக்கெட் தான்.

ஐபிஎல் தொடரில் சன் ரைசர்ஸ் ஹைதராபாத் அணியின் பிரதிநிதி மற்றும் நிர்வாக முகமாக அவர் தோன்றத் தொடங்கியபோது, ரசிகர்களின் கவனம் இயல்பாகவே அவரை நோக்கி திரும்பியது. சன் ரைசர்ஸ் அணியின் தலைமை செயல் இயக்குநரான அவர், கடந்த சில ஆண்டுகளாக வீரர்கள் ஏலத்தில் பங்கேற்பது, அணியின் நிர்வாக முடிவுகளில் இடம்பெறுவது, போட்டிகளின் போது அரங்கில் இருந்து வீரர்களை உற்சாகப்படுத்துவது போன்ற காட்சிகள் அவரை இந்திய கிரிக்கெட்டின் மிகவும் பரிச்சயமான நிர்வாகிகளில் ஒருவராக மாற்றின. வெற்றி பெற்றபோது வெளிப்படும் மகிழ்ச்சியும், தோல்வியின்போது தெரியும் ஏமாற்றமும் சமூக ஊடகங்களில் அடிக்கடி பேசுபொருளாகின.

தென்னாப்ரிக்க கிரிக்கெட் போட்டிகளில் சன் ரைசர்ஸ் ஈஸ்டர்ன் கேப் என்ற அணியையும் இவர் நிர்வகிக்கிறார். தி ஹண்ட்ரெட் (The Hundred) எனும் இங்கிலாந்து மற்றும் வேல்ஸில் நடத்தப்படும் குறுகிய வடிவ கிரிக்கெட் போட்டிகளில் சன்ரைசர்ஸ் லீட்ஸ் என்ற அணியையும் நிர்வகிக்கிறார் காவ்யா மாறன்.

நடிகர் ரஜினிகாந்த், காவ்யா மாறன், கலாநிதி மாறன் மூவரும் பங்கேற்றிருந்த நிகழ்ச்சி ஒன்றில், மேடையில் பேசிய ரஜினிகாந்த், "சன் ரைசர்ஸ் அணியில் நல்ல வீரர்களை சேருங்கள். போட்டியின்போது காவ்யா கொடுக்கும் முக பாவனைகளை பார்த்தால் நமக்கு பதற்றமாகிவிடுகிறது" என்று குறிப்பிட்டு பேசியது சமூக ஊடகங்களில் பலரது கவனத்தையும் ஈர்த்தது.

நடிகர் ரஜினிகாந்த் சன் குழுமத்தின் சினிமா அலகான சன் பிக்சர்ஸ் தயாரிப்பில் பல திரைப்படங்களில் நடித்துள்ளார். அவர் கடைசியாக நடித்து வெளியான ஜெயிலர் 2 திரைப்படம் சன் பிக்சர்ஸ் தயாரிப்பில், அனிருத் ரவிச்சந்தர் இசையமைப்பில் வெளியாகியது.

ஐபிஎல் போட்டிகளை தொடர்ந்து பார்ப்பவர்களுக்கு காவ்யா மாறனின் முகம் மிகவும் பரிச்சயமானதாக இருந்தாலும், அவரது பேச்சுகளை கேட்டவர்கள் மிகக் குறைவு. அரிதாகவே அவர் ஊடகங்களுக்கு நேர்காணல் வழங்கியிருக்கிறார். அதேபோல், சமூக ஊடகங்களிலும் அவர் வெகுவாக இயங்குவதில்லை.

இந்த திருமணம் தமிழ்நாட்டின் இரண்டு செல்வாக்கு மிக்க வட்டாரங்களின் சந்திப்பாகவும் பார்க்கப்படுகிறது. ஒருபுறம் ஊடகமும் அரசியலும் இணைந்த மாறன் குடும்பம்; மறுபுறம் தமிழ் சினிமாவின் மிகப்பெரிய நட்சத்திரமான ரஜினிகாந்த்தின் குடும்பத்துடன் தொடர்புடைய, இசையுலகில் பிரபலமான அனிருத் ரவிச்சந்தர்.

ரஜினிகாந்த்தின் மனைவி லதாவின் சகோதரர் ரவி ராகவேந்திரா. அவருடைய மகன் தான் அனிருத் ரவிச்சந்தர். தமிழ்நாட்டின் முன்னாள் முதலமைச்சர் மு.கருணாநிதியின் சகோதரியின் மகனான முரசொலி மாறனின் பேத்தி காவ்யா மாறன் ஆவார்.

- இது, பிபிசிக்காக கலெக்டிவ் நியூஸ்ரூம் வெளியீடு