சில நேரங்களில், மேனகா காந்தி சிரிப்பதைக் கேட்டால் சோனியா காந்தி அவரிடம் செல்வார். எதற்காக இவ்வளவு சிரிக்கிறீர்கள் என்று கேட்பார். பின்னர், அவருடன் அமர்ந்து அவர் கூறும் கதைகளைக் கேட்டுக்கொண்டிருப்பார். அந்தக் கதைகள் மேனகாவின் நண்பர்களைப் பற்றியதாகவோ அல்லது அவர் படித்துக்கொண்டிருந்த புத்தகத்தைப் பற்றியதாகவோ இருக்கும்.

சோனியாவின் மகள் பிரியங்காவும், தனது சித்தி மேனகாவின் அறையில் அமர்ந்து அவருடன் பேசுவதும், அவர் கூறும் கதைகளைக் கேட்பதும் வழக்கம். சஞ்சய் காந்தியைத் திருமணம் செய்துகொண்டு, இந்திரா காந்தி குடும்பத்தின் இளைய மருமகளாக மேனகா இணைந்திருந்த தொடக்கக் காலத்தைச் சேர்ந்த நினைவுகள் இவை.

வீட்டுக்கு இளைய மருமகளாக ஓர் இளம் பெண் வந்ததைத் தொடக்கத்தில் தான் மகிழ்ச்சியுடன் வரவேற்றதாக சோனியா காந்தி எழுதியுள்ளார். ஆனால், காலப்போக்கில் அவர்களது உறவிலும் வீட்டின் சூழலிலும் மாற்றங்கள் ஏற்பட்டதாக அவர் குறிப்பிட்டுள்ளார்.

சோனியா காந்தி எழுதிய 'பிலாங்கிங்: எ ஜர்னி ஆஃப் லவ்' புத்தகத்தில், மேனகா காந்தியுடனான தனது உறவு குறித்த நினைவுகளை, அவர்களது ஆரம்பகால நெருக்கம் முதல் மேனகா குடும்பத்தை விட்டு வெளியேறிய காலம் வரையிலான நிகழ்வுகளுடன் விவரித்துள்ளார்.

526 பக்கங்களைக் கொண்ட இந்தப் புத்தகத்தை ஹார்பர்காலின்ஸ் இந்தியா நவம்பர் 10ஆம் தேதி வெளியிட்டது.

இந்தப் புத்தகத்தின் சில பகுதிகளைச் செய்தி நிறுவனமான பிடிஐ, என்டிடிவி மற்றும் 'தி வீக்' இதழ் ஆகியவை வெளியிட்டுள்ளன.

வீட்டிற்கு 'இளைய மருமகள்' வந்தபோது...

பிடிஐ செய்தி நிறுவனத்தின் தகவலின்படி, சஞ்சய் காந்தி முதன்முதலில் மேனகாவை 1973-ஆம் ஆண்டின் பிற்பகுதியில் சந்தித்ததாக சோனியா காந்தி தனது புத்தகத்தில் குறிப்பிட்டுள்ளார்.

அந்தச் சந்திப்புக்குப் பிறகு ஓராண்டுக்குள் இருவரும் திருமணம் செய்துகொண்டனர். அப்போது மேனகாவுக்கு வயது 18.

மேனகாவை மிகுந்த உற்சாகம் கொண்டவராகவும், அனைவருடனும் எளிதில் பழகக்கூடியவராகவும், அதிகம் பேசும் இயல்புடையவராகவும் சோனியா நினைவுகூர்கிறார்.

மேனகாவின் வருகை ஆரம்பத்தில் வீட்டின் சூழலையே மாற்றியதாக அவர் குறிப்பிடுகிறார். தனது கணவரின் தம்பி மனைவியிடம் ஒரு தோழியைக் கண்ட சோனியா, அவரைத் தனது தங்கை போலவே கருதியதாக கூறியுள்ளார்.

மேனகாவின் சிரிப்பொலி கேட்டதும், அந்த உரையாடலில் தானும் கலந்துகொள்ள விரும்பி அவரிடம் செல்வது வழக்கம் என்றும் சோனியா கூறுகிறார்.

பிரியங்கா காந்தியும் தனது சித்தி மேனகாவுடன் மிகவும் நெருக்கமாக இருந்தார். அவர் அடிக்கடி மேனகாவின் அறையில் அமர்ந்து, அவர் கூறும் கதைகளை மிகுந்த ஆர்வத்துடன் கேட்டுக்கொண்டிருப்பார் என சோனியா நினைவுகூர்கிறார்.

இருப்பினும், காலப்போக்கில் மிகச் சிறிய விஷயங்கள்கூட குடும்பத்தில் மனக்கசப்புகளை ஏற்படுத்தத் தொடங்கின என்று சோனியா குறிப்பிடுகிறார்.

சோனியா காந்தியின் இந்த நினைவுப் பதிவுகள் குறித்து மேனகா காந்தியோ அல்லது அவரது குடும்பத்தினரோ இதுவரை எந்தக் கருத்தும் தெரிவிக்கவில்லை.

வீட்டுப் பணியாளர்கள் சோனியாவை 'மூத்த மருமகள்' என்றும், மேனகாவை 'இளைய மருமகள்' என்றும் அழைத்து வந்தனர்.

ஆனால், தனது பார்வையில் இருவரும் சமமானவர்களே என்றும், குடும்பத்தின் மகள்களைப் போலவே இருவருக்கும் அந்த வீட்டில் உரிய இடம் இருந்ததாகவும் சோனியா குறிப்பிடுகிறார்.

இருப்பினும், இவ்வாறு தனித்தனியாக அழைக்கப்பட்டது, குடும்பத்தில் தனக்குக் குறைவான அந்தஸ்து இருப்பதைப் போன்ற உணர்வை மேனகாவுக்கு ஏற்படுத்தியிருக்கலாம் என்று சோனியா கருதுகிறார்.

மேனகா சில நேரங்களில் சுருக்கமாகவும் கடுமையாகவும் பேசும்போது, குடும்பத்தில் அமைதியைப் பேணும் நோக்கில் தான் பெரும்பாலும் அமைதியாக இருப்பதை வழக்கமாக கொண்டிருந்ததாக சோனியா கூறுகிறார்.

ஆனால், பொறுத்துக்கொள்ள முடியாத சூழல் ஏற்பட்டால் தானும் கடுமையாகப் பதிலளித்ததாக அவர் எழுதியுள்ளார்.

மேனகா போன்ற இளம் பெண், கூட்டுக் குடும்பத்தில் தன்னைப் பொருத்திக்கொள்வது எளிதாக இருந்திருக்காது என்றும் சோனியா கருதுகிறார்.

குடும்ப உறுப்பினர்கள் ஒவ்வொருவரும் தங்களது வேலைகளில் மும்முரமாக இருந்ததால், வீட்டுச் சூழல் மேனகாவுக்குக் கட்டுப்பாடுகள் நிறைந்ததாகவும் சலிப்பூட்டுவதாகவும் தோன்றியிருக்கலாம் என்று அவர் குறிப்பிட்டுள்ளார்.

பின்னர், சஞ்சய் காந்தியுடன் அரசியல் நிகழ்வுகளில் பங்கேற்க மேனகா செல்லத் தொடங்கியபோது, புதிய சூழலில் அவர் ஓரளவுக்கு இயல்பாகவும் வசதியாகவும் உணரத் தொடங்கினார் என்று சோனியா எழுதுகிறார்.

'’ஆனால், அதே காலகட்டத்தில் குடும்பத்திற்குள் கருத்து வேறுபாடுகளும் அதிகரிக்கத் தொடங்கின. இதன் விளைவாக, தனக்கும் மேனகாவுக்கும் இடையிலான நெருக்கத்திலும் படிப்படியாக விரிசல் ஏற்பட்டதாக’’ சோனியா குறிப்பிடுகிறார்.

சஞ்சய் காந்தியின் மறைவு

சஞ்சய் காந்தி 1980-ஆம் ஆண்டு ஜூன் 23-ஆம் தேதி நிகழ்ந்த விமான விபத்தில் உயிரிழந்தார்.

அதன்பிறகு, காங்கிரஸ் கட்சியில் மேனகாவுக்கு அரசியல் பொறுப்பு வழங்கலாமா என்ற கேள்வி குடும்பத்தினர் மத்தியில் எழுந்ததாக சோனியா தனது நினைவுக் குறிப்பில் தெரிவித்துள்ளார்.

அந்த நேரத்தில், மேனகாவுக்கு பொறுப்பு வழங்க இந்திரா காந்தி விரும்பவில்லை என்று சோனியா குறிப்பிடுகிறார்.

அப்போது மேனகாவுக்கு 23 வயதுதான் என்றும், அந்தப் பொறுப்பை ஏற்க அவர் மிகவும் இளையவர் என்றும் இந்திரா காந்தி கருதியதாக சோனியா எழுதியுள்ளார். மேலும், மேனகாவின் குழந்தைக்கு அப்போது மூன்று மாதங்களே ஆகியிருந்ததால், குழந்தையைக் கவனித்துக்கொள்ள அவருக்கு அவகாசம் தேவை என்றும் இந்திரா நினைத்ததாகக் குறிப்பிட்டுள்ளார்.

அரசியல் லட்சியங்களை நிறைவேற்ற மேனகாவுக்கு எதிர்காலத்தில் நிறைய காலம் இருக்கிறது என்றும் இந்திரா காந்தி நம்பியதாக சோனியா எழுதியுள்ளார்.

ஆனால், மேனகாவுக்கு அரசியல் ரீதியாக முற்றிலும் மாறுபட்ட திட்டங்களும் எதிர்பார்ப்புகளும் இருந்தது விரைவிலேயே தெரியவந்ததாக அவர் குறிப்பிடுகிறார்.

இந்தக் கருத்து வேறுபாடு நாளடைவில் குடும்பத்தினருக்கு இடையிலான உறவிலும் விரிசலை ஏற்படுத்தியது என எழுதியுள்ளார்.

மேனகா வீட்டை விட்டு வெளியேறியது ஏன்?

சோனியா காந்தியின் கூற்றுப்படி, இந்திரா காந்தி அரசுமுறைப் பயணமாக லண்டன் சென்றிருந்தபோது, மேனகா வீட்டிலிருந்த தனது உடைமைகளை எடுத்துக்கொண்டு வெளியேறத் தயாராகி வருவதை அறிந்தார்.

லண்டனிலிருந்து திரும்பியதும், இந்திரா காந்தி மேனகா முன் இரண்டு தெரிவுகளை வைத்ததாக அவர் எழுதியுள்ளார்.

தனக்குப் பிடிக்காத அரசியல் நடவடிக்கைகளைக் கைவிட வேண்டும் அல்லது வீட்டை விட்டு வேறு இடத்துக்குச் செல்ல வேண்டும் என்று இந்திரா காந்தி கூறியதாக சோனியா குறிப்பிட்டுள்ளார்.

இதற்குப் பதிலளிக்கும் வகையில், இந்திரா காந்திக்கு மேனகா ஒரு கடிதம் எழுதியதாகவும், அதில் பல குற்றச்சாட்டுகளை முன்வைத்ததாகவும் சோனியா எழுதியுள்ளார்.

என்டிடிவி வெளியிட்ட புத்தகத்தின் ஒரு பகுதியின்படி, மேனகா வீட்டை விட்டு வெளியேறியபோது இந்திரா காந்தியுடன் அவருக்கு வாக்குவாதம் ஏற்பட்டது. அப்போது ராஜீவ் காந்தியும் சோனியாவும் வீட்டில் இல்லை.

இருப்பினும், இந்திரா காந்தியுடன் சேர்த்து ராஜீவ் காந்தியையும் தன்னையும் வீட்டை விட்டு வெளியேறியதற்குப் பொறுப்பானவர்களாக மேனகா கருதியதாக சோனியா எழுதியுள்ளார்.

இந்த விவகாரம் வீட்டுக்குள் நடந்த ஒரு பிரச்னையாக மட்டும் இல்லாமல், அரசியல் வட்டாரங்களிலும் ஊடகங்களிலும் பேசப்படும் வகையில் பொதுவெளிக்குக் கொண்டுசெல்லப்பட்டதாகவும் சோனியா குற்றம்சாட்டியுள்ளார்.

சோனியாவின் புத்தகத்தில் இடம்பெற்றுள்ள இந்த நினைவுகள், மேனகாவின் சிரிப்பும் இருவருக்கும் இடையிலான இயல்பான உரையாடல்களும் நிறைந்த தொடக்கக் காலத்திலிருந்து தொடங்குகின்றன.

ஆனால், இறுதியில் அந்த உறவு குடும்பம் மற்றும் அரசியல் தொடர்பான குற்றச்சாட்டுகளால் சிக்கலானதாக மாறியது.

இவ்வாறு, மேனகாவுடனான தனது உறவை இரண்டு முற்றிலும் மாறுபட்ட கோணங்களில் சோனியா காந்தி தனது நினைவுக் குறிப்பில் பதிவு செய்துள்ளார். முதலாவது, 'இளைய மருமகள்' என்ற பாசமான நினைவு. இரண்டாவது, குடும்பத்துக்குள் இருந்த கருத்து வேறுபாடுகள் வீட்டின் நான்கு சுவர்களையும் தாண்டி, பொதுவெளியிலும் அரசியல் அரங்கிலும் சர்ச்சையாக மாறிய உறவு.

- இது, பிபிசிக்காக கலெக்டிவ் நியூஸ்ரூம் வெளியீடு