புகைப்படம்: BBC Webite

பாலிவுட் நடிகர் டைகர் ஷெராஃப், மும்பையில் நடத்தப்பட்ட துப்பாக்கிச் சூட்டுச் சம்பவத்தில் காயமின்றி உயிர் தப்பியதாக இந்தியப் பொலிஸார் தெரிவித்துள்ளனர். இச்சம்பவம் தொடர்பாகப் பொலிஸார் விசாரணை நடத்தி வருகின்றனர்.

36 வயதான டைகர் ஷெராஃப், ஞாயிற்றுக்கிழமை மாலை மும்பையின் ஜூஹு பகுதியில் உள்ள கால்பந்து விளையாட்டுக் கழகத்திலிருந்து காரில் புறப்பட்டபோது இந்தத் தாக்குதல் நடத்தப்பட்டுள்ளது.

சமூக வலைத்தளங்களிலும் ஊடகங்களிலும் வெளியான காணொளிகளில், கார் மெதுவாகச் சென்றுகொண்டிருந்தபோது, குறைந்தது இருவர் அதன் முன்பக்கப் பயணியர் இருக்கையை நோக்கிப் பலமுறை துப்பாக்கியால் சுடுவது பதிவாகியுள்ளது.

இந்தத் தாக்குதலில் டைகர் ஷெராஃப்பின் கார் ஓட்டுநர் உட்பட இருவர் காயமடைந்ததாக உள்ளூர் ஊடகங்கள் செய்தி வெளியிட்டுள்ளன.

மகாராஷ்டிர மாநிலத்தின் துணை முதலமைச்சர் ஏக்நாத் ஷிண்டே, சம்பவத்துக்குப் பிறகு நடிகரைச் சந்தித்தார். டைகர் ஷெராஃப் மற்றும் அவரது தாயார் இந்தத் தாக்குதலால் அதிர்ச்சியடைந்ததாகவும், மக்களை அச்சுறுத்தும் இத்தகைய செயல்கள் பொறுத்துக்கொள்ளப்படாது என்றும் அவர் தெரிவித்தார்.

இந்தியாவில் பிரபலங்கள் மீதான தாக்குதல்கள் குறித்த கவலை அதிகரித்து வரும் நிலையில், இச்சம்பவம் மேலும் கவனத்தை ஈர்த்துள்ளது.

கடந்த 2024ஆம் ஆண்டு, பாலிவுட் நடிகர் சல்மான் கானின் வீட்டைக் குறிவைத்து நடத்தப்பட்ட துப்பாக்கிச் சூடு தொடர்பாகக் குற்றக் கும்பலைச் சேர்ந்த இருவரை இந்தியப் பொலிஸார் கைது செய்தனர். அதே ஆண்டில், மும்பையில் செல்வாக்குமிக்க அரசியல்வாதி பாபா சித்திக் துப்பாக்கியால் சுட்டுக் கொல்லப்பட்டார்.

மூலம்: BBC Website